БИШКЕК, 7-янв. — Sputnik. Иранда генерал Касем Сулейманини акыркы сапарга узатып жатканда кишилердин түртүшүп, жөөлөшүүсүнөн 50дөн ашуун адам тепсендиде калып каза тапты. Бул туурасында РИА Новости билдирди.
Маалыматтарда 200дөн ашуун кишинин жабыркаганы айтылган.
"Бул окуяда каза тапкандардын саны 50дөн ашкан. Алар негизинен эркек кишилер экендиги анык болду", — деп билдирген Керман провинциясынын соттук медицина уюмунун башчысы Аббас Амиян.
Ирандык генерал менен коштошуу анын туулган шаары Керманда шейшемби күнү эртең менен башталган. Жергиликтүү басылмалар аны менен коштошууга келгендердин саны арбын болгондуктан жерге берүү зыйнаты жылдырылган.
Россиянын тышкы иштер министри Сергей Лавров мамлекеттик катчы Майк Помпеого АКШ генералды өлтүрүү менен эл аралык укукту бузганын айткан. Ал эми Россиянын президенти Владимир Путин менен Франциянын башчысы Эммануэль Макрон Сулейманинин өлүмүнө кабатыр болуп жатышканын билдиришкен.
Сулейманинин өлүмүнөн кийин миңдеген ирандыктар митингге чыккан.
Ирак бийлиги болсо өлкө аймагындагы америкалык аскерлердин ишмердүүлүгүнө чектөө киргизген чечим кабыл алды.
Ал эми аны менен коштошуу учурунда генералдын кызы Зейнаб Сулеймани өз сөзүндө америкалыктарга "азалуу күн" убада кылган.
