Кутубаев: калкты көмүр менен камсыздоо планы 95 пайызга аткарылды
2019-2020-жылдын күз-кыш мезгилине карата калкты көмүр менен камсыздоо планы 11 айдын жыйынтыгы менен 95 пайызга аткарылды. Бул тууралуу Замирбек Кутубаев Sputnik Кыргызстан радиосуна программасында маек куруп жатып билдирди.
Анын айтымында, быйылкы жылытуу мезгилине жалпы жонунан 2,5 миллион тонна көмүр казуу пландалган.
"Декабрь айына карата бюджеттик мекемелерге 206 миң тонна көмүр ташылып келүүсү керек болсо, иш жүзүндө 106 миң тонна алып келинди. Бул жылдык пландын 83 пайызы аткарылгандыгынан кабар берет. Ал эми калкты көмүр менен камсыздоо багытында 870 миң тонна көмүр алып келүү максатталса, бүгүнкү күндө 905 миң тонна өлкөнүн бардык аймактарына жеткирилди. Буга ылайык, жылдык план 104 пайызга ишке ашты десек болот. Ал эми ТЭЦке 680 миң тонна көмүр керектелсе, анын 414 миң тоннасы ташып келинди. Калган бөлүгү атайын келишимдин негизинде 2020-жылдын март айларына чейин ташылып турат", — деди Кутубаев.
Ал 2019-жылы жергиликтүү көмүр өндүрүүчүлөр Кытай, Өзбекстан жана Тажикстанга жалпы жонунан 333 миң тонна кара алтын экспорттошконун кошумчалады.
