Окуя Рио-де-Жанейродо болгон. Иттин балага кол салганы ошол аймактагы имараттын бириндеги камерага жазылып калган.
Питбуль төрт жашар Жоао Педрого аны баккан аял менен бара жатканда кол салгандыгын The Daily Mail жазды.
Ошол маалда өтүп бара жаткан Патрик ду Сеу бөбөккө жардамга келип, аны куткарып калган. Анткен менен жырткыч сымал жаныбар баланы тиштеген бойдон жулкулдатып, бир топко чейин коё берген эмес. Патрик аны оозунан жулуп алганда, ит жигиттин өзүнө кол салган.
Шаштысы кеткен жигит баланы жанында турган жеңил автоунаанын үстүнө коё салган да, андан соң өзү секирип чыккан. Алар куткаруу кызматы келгенче ошол жерде отурушкан.
Басылманын маалыматына караганда, жигиттин колу-бутун жана бөбөктүн моюнун бир топ эле тиштеп койгон. Экөө ооруканага жатып, дарыгерлер алардын жараатын тиккен. Ал эми итти ветеринарлар алып кеткен.
