Токтошев: өлкөдө келечекте пенсия төлөп бере албай калуу коркунучу бар
Учурда Кыргызстанда 670 миң адам пенсия алат. Алардын алган акчасы орто эсеп менен 4000-5000 сомду түзөт. Бирок 3-4 жылдан кийин өлкө казынасынан бул сумманы да төлөп бере албай калышыбыз мүмкүн. Бул тууралуу Эмил Токтошев Sputnik Кыргызстан радиосунун эфиринде маек куруп жатып билдирди.
Анын айтымында, өнүккөн мамлекеттерде бир пенсионерге үч жумушчу туура келсе, бизде ар бир пенсионерге бирден адам Социалдык фондго каражат которот.
"Пенсия системасын түп-тамырынан бери өзгөртпөсө туңгуюкка кептелүү коркунучу бар. Анткени учурда өлкөдө 670 миңге чукул адам казынадан акча алат. Алардын пенсиясын каржылоого ар бирине бирден иштеп жаткан адам туура келет экен. Бул көрсөткүч башка мамлекеттерде бир пенсионерге үчтөн кызматкерди түзөт. Тактап айтканда, бир карыя пенсия алышы үчүн үч адамдын которгон акчасы кетет. Бизде пенсия менен камсыздоо көйгөйгө айланып бара жаткан маселе. Кандайдыр бир өзгөртүүлөрдү чукул арада киргизбесек, келечекте пенсионерлерге акча таап бере албай калышыбыз мүмкүндүгүн экономист серепчилер да айтып келет", — деди депутат.
Эл өкүлү ошондой эле пенсияны көбөйтүүдө пайыздык ченем менен эмес, майнаптуу башка жолдорун иштеп чыгуу зарылдыгын кошумчалады.
