Мода дүйнөсүн багынткан кыргызстандык сулуулар. Көз талдырган сүрөттөр

Sputnik Кыргызстан агенттиги төбөсү көрүнүп калган моделдерди тизмектеди.

Бегимай Карыбекова

Бул сулуу кыз "Кыргызстан сулуусу — 2017" наамын алгандан кийин көбүрөөк таанылды.

Былтыр Карыбекова "Аалам сулуусу" эл аралык сулуулук сынагына катышкан биринчи кыргызстандык кыз болду. Ал алдыңкы орундарга ээ болбосо да өлкө атын таанытканга салым кошту. Кечээ жакында эле беделдүү делген италиялык Emporio Armani брендинин модели болду.

Ошондой эле Миландагы мода жумалыгына катышып, италиялык дизайнер Брунелло Кучинеллинин кийимин кийип чыккан.

Салидат Хамилова

Кыргызстанда төрөлүп-өскөн кыз учурда АКШда жашайт. Моделдик карьерасын Бишкекте студент болуп жүргөндө баштаган.

Бийкеч америкалык сүрөтчүлөр менен тыгыз иштешет. Соңку ирет Нью-Йорктогу мода жумалыгына катышып, Ким Шуи жана Эшли Рэйнор аттуу дизайнерлердин коллекциясын тааныткан.

Айжан Асемова

Кыргызстандагы белгилүү блогер жана моделдердин бири. Instagram социалдык тармагы аркылуу таанылып, учурда 967 миң катталуучу топтой алган.

Алгач 14 жашында кийим дүкөнүндө моделдикти аркалаган.

Өлкөдөгү ири компаниялардын роликтерине тартылып, журнал беттерине чыгып келет. "Жарайт сити" долбооруна жана казакстандык "Хештегнутые" сериалына тартылган.

Каныкей Аилчиева

Аилчиева алып баруучу катары көбүрөөк таанымал. Моделдик чөйрөдө Москвадагы эл аралык сынакта "Азиянын сулуусу" наамын алгандан кийин белгилүү боло баштаган.

Ушул сынактын алкагында мода жана таланттар сынагы өтүп, катышуучулар дизайнер Вячеслав Зайцевдин кийимин кийип чыгышкан. Анда кыргызстандык сулуу "Мыкты подиум модели" аталган.

Бир канча айдан кийин Түркияда өткөн Universe Beauty — 2019 сулуулук, мода жана талант фестивалынын баш байгесин жеңип алган.

Мээрим Атантаева

Моделдиктен тышкары актрисалыкты да аркалап келет. Түштүк Кореяда өткөн Asian Model Festival сынагында эки ирет "Борбордук Азиянын мыкты модели" деп табылган.

Кино жаатында "Мунабия", "Курут", "Страшно красивый" жана "Луч надежды ", "Таксист" сыяктуу тасмаларга тартылган.

Атантаева учурда россиялык сериалдарга тартылууда.