БИШКЕК, 27-ноя. — Sputnik. Улуттук коопсуздук мамлекеттик комитети аймактар аралык касташууну козуткан деген шек менен кармаган А.Ж. аттуу жаран "БеспределKG" баракчасынын администратору экенин жергиликтүү ЖМКлар жазып чыгышты.
Андагы маалыматка караганда, А.Ж. УКМКнын тергөө абагына киргизилген.
Ал эми УКМКнын маалымат кызматы А.Ж. чагымчыл жана учурдагы өкмөттү жамандаган маалыматтарды социалдык тармактагы колдонуучулардын арасына жайылтып, массалык нааразычылык актыларын уюштурууга үндөгөнүн кабарлаган.
"Мындан улам колдонуучулар арасында терс ойлор туулуп, аймактар аралык касташуу жаралган", — дешти УКМКдан.
Учурда А.Ж. Кылмыш-жаза кодексинин 313-беренесинин 2-бөлүмү ("Аймактар аралык касташууну козутуу") боюнча кылмышка шектелип, тергөө иштери жүрүп жатат.
