БИШКЕК, 25-ноя. — Sputnik. Ак үйдүн жанында митинг өткөрүүгө тыюу салынды, бирок келген адамдар куулбайт. Бул туурасында Коопсуздук кеңешинин катчысы Дамир Сагынбаев маалымат жыйында билдирди.
Эске сала кетсек, коррупцияга жана уурулукка каршы митинг бүгүн, 25-ноябрда, саат 11:30да Ак үйдүн жанында пландалган.
Сагынбаев сот Ак үй менен өкмөт аппаратынын имаратынын жанында акция өткөрүүгө убактылуу чектегенин эскертти.
"Эгер митинг өтө турган болсо, келгендер куулбайт деп ойлойм. Биз демократиялуу өлкө болуп саналабыз. Эл чыгып өз пикирин айткысы келет. Менимче, иштейм дегендер иштеп жатат, кээ бирлер үчүн минингдерди өткөрүп, аларга катышуу жумуш болуп саналат", — деп билдирген Сагынбаев.
Митингдин себеби
Эки ЖМКнын Кытайдан аткезчилик жолу менен алып келинген товарлар жөнүндө биргеликте жасаган иликтөөсү коомчулукту дүрбөлөңгө салды. Андагы маалыматка караганда, Матраимовдордун үй-бүлөсү Хабибула Абдукадыр аттуу уйгур тектүү адамдын үй-бүлөсү менен биргеликте бизнес жасап жүрүшкөн. Материал 10-ноябрда Стамбулда киши колдуу болгон Айэркен Саймаити берген маалыматтардын негизинде даярдалган. Иликтөөдө Саймаити өлөр алдында Кыргызстандын бажысындагы коррупция тууралуу маалыматтарды берүүгө үлгүргөнү айтылган.
