БИШКЕК, 22-ноя. — Sputnik. Жогорку Кеңештин депутаты Дастан Бекешев президент Сооронбай Жээнбековдон Бажы кызматынын төрагасынын мурдагы орун басары Райым Матраимовду кармоого буйрук бериши керектигин талап кылды. Ал мындай кайрылуусун өзүнүн расмий сайтына жарыялады.
Белгилей кетсек, ушу тапта журналисттердин жасаган иликтөөсү коомдо чоң резонанс жаратууда. Анда маркум Айэркен Саймаитинин ишмердүүлүгү, бир тууган Матраимовдор менен байланышы жана ири суммадагы акчанын Кыргызстандан чыгарылышы изилденген. Иликтөөдө журналисттер Саймаитинин өзү менен байланышып, негизги окуялардын өнүгүшүн өз оозунан угушкан.
Депутат Бекешев кайрылуусунда иликтөө жасаган журналисттер менен алардын жакындарынын коопсуздугу камсыздалышы керектигин белгилеген.
"Уюшкан кылмыштуу топ тарабынан кысым болбошу үчүн журналисттер менен анын жакындарынын коопсуздугун камсыздоо зарыл. Бажы органдарын баш кылып туруп укук коргоо органдарынын бардык жетекчилерин алмаштыруу керек. Себеби мамлекетте болуп жаткан бардык нерсеге тиешеси бар. Алар объективдүү иликтөөнү камсыздай албайт, андан сырткары, аларга эч ким ишенбей калды. Коом ишенген кишилерди дайындоо керек. Муну менен бирге расмий түрдө тыкыр иликтөө жүргүзүп, акчаны сыртка чыгаргандарды, шарт түзүп бергендерди жоопко тартуу керек", — деди ал.
Эл өкүлү мындан ары унчукпай коё албастыгын айтып, тургундарды #матрстангакаршымын деген хештег менен социалдык тармакта митинг уюштурууга чакырды. Эгер мындан майнап чыкпаса, андан ары кандай аракет кылуу керектигин ойлоно турганын айткан.
