БИШКЕК, 29-окт. — Sputnik. Узаган жумада кыргызстандык мушкер Рафаэль Физиев беделдүү делген UFC мушкерлер уюмунун турниринин алкагында алгачкы жеңишин камсыздаган.
Ал катышкан UFC Fight Night 162 турнири Сингапурда өткөн. Кыргызстандык мушкер октагондо америкалык мушкер Алекс Уайт менен кезиккен.
SportsDaily спорттук порталынын жазышынча, бул беттеши үчүн Физиев 23 500 доллар алган. Анын 10 миңин турнирге катышканы үчүн, дагы 10 миңин жеңиши үчүн, ал эми 3,5 миң долларды Reebok компаниясын жарнамалап алган.
Физиевдин атаандашы 21 миң доллар тапкан. 16 миң доллар турнирге катышканы үчүн, 5 миң долларды Reebok компаниясын жарнамалап алган.
Физиев UFC уюмунун турнирине үстүбүздөгү жылдын апрель айында биринчи жолу катышкан. Санкт-Петербургдагы мелдеште ал россиялык Магомед Мустафаевге жеңилип калган. Экинчи ирет ал бразилиялык Алекс Сильва менен Уругвайда беттешмек, бирок бутунан жаракат алып калгандыктан катышпай калган.
