БИШКЕК, 26-окт. — Sputnik. Александр Македонский панкреонекроз (уйку безинин илдети) оорусунан каза тапканы аныкталды. Буга чейин ал малярия (безгек), ич келтеси жана өпкө оорусунан көз жумганы айтылып келген. Бул тууралуу РИА Новости жазды.
Иликтөөнүн автору, медицинанын ардактуу профессору Томас Герасимидистин айтымында, Александр курч панкреонекроздон улам жаралган сепсистен (микробдордун канда көбөйүп, организмге тарашы — ред.) көз жумган. Бул ооруга өттөгү таш себеп болушу мүмкүн. Аскер башчынын табити күчтүү тамактарга тартып, ичимдикке жакын болгону айтылат.
"Күчтүү азык-түлүк, винодон ичкенден кийин ичи катуу ооруп, денесин калтырак басып, эки жумага чейин кыйналган", — деп айтылат иликтөөдө.
Ошондой эле профессор Герасимидис Македонский малярия (безгек), ич келтеси жана өпкө оорусунан көз жумган деген маалыматтарды четке какты.
Александр Македонский — Македониянын башчысы, улуу аскер башчы болгон. Кезинде дүйнөлүк державаны түзгөн. Биздин заманга чейин 356-323-жылдары жашаган.
