БИШКЕК, 18-окт. — Sputnik. Афганистандын Кичи жана Улуу Памир аймагында жашаган этникалык кыргыздарга гуманитардык жардам жеткирилди. Бул тууралуу өкмөттүн маалымат кызматынан кабарлашты.
Гуманитардык экспедиция памирлик кыргыздарга азык-түлүк, жылуу кийим-кече, жылытуу мештери, дары-дармек, медициналык буюмдар жана башка эң керектүү болгон товарларды жеткирди. Бул үчүн өкмөт 5 миллион сом бөлгөн. Жүктүн жалпы салмагы 70 тоннаны түздү.
Мындан тышкары, барган дарыгерлер медициналык жардам көрсөтүштү.
"Элди медициналык кароодон өткөрүп, төрөт кабыл алып жана катуу ооруп жаткандарга шашылыш жардам берилди", — деп айтылат маалыматта.
Экспедициянын мүчөлөрүн Афганистан Республикасынын Тышкы иштер министрлигинин, Миграциялык кызматтын, Бадахшан провинциясынын жана Вахан районунун администрациясынын өкүлдөрү жана премьер-министрдин этникалык кыргыздар маселеси боюнча кеңешчиси Ажи Махмуд тосуп алды.
