БИШКЕК, 11-окт. — Sputnik. Өзбекстанда быйыл 22-декабрда парламенттик шайлоо өтөрүн Sputnik Өзбекстан агенттиги жазды.
Шайлоого катышууну каалаган партиялардын документин кабыл алуу өнөктүгү башталып, өлкөдөгү беш партия БШКга арыз берген.
Белгилей кетсек, негизи Өзбекстанда расмий түрдө каттоодон өткөн беш партия бар. Алар Өзбекстандын элдик-демократиялык партиясы, Өзбекстандын либералдык-демократиялык партиясы, "Миллий тикланиш" демократиялык партиясы, "Адолат" социалдык-демократиялык партиясы жана Өзбекстандын экологиялык партиясы.
Шайлоого катышуу үчүн ар бир партия шайлоочулардан 40 миңден кем эмес кол топтошу керек. Документтер шайлоого 35 күн калган убакытка чейин кабыл алынат.
