БИШКЕК, 4-окт. — Sputnik. Мамлекет билим берүү системасын өнүктүрүүгө жана педагогдордун эмгек шартын жакшыртууга бардык аракеттерди көрүп жатат. Бул тууралуу президент Сооронбай Жээнбековдун билим берүү кызматкерлерине арналган куттуктоосунда айтылган.
Аны өлкө башчынын аппарат жетекчиси Досалы Эсеналиев Токтогул Сатылганов атындагы Кыргыз улуттук филармониясында мугалимдер күнүнө карата өткөн салтанаттуу иш-чарада окуп берди.
"Негизги максатыбыз — ар бир адам үчүн өз дараметин ачууга көмөктөшкөн, практикада колдонууга багытталган, дүйнөдөгү өзгөрүүлөргө ыңгайлашкан сапаттуу билим алууга мүмкүндүк түзүү. Ал үчүн жаңы бала бакчалар жана мектептер колдонууга берилип, билим берүү уюмдарынын материалдык-техникалык базасы жакшырып, анын ичинде санариптештирүү процесси ишке ашырылууда. Ушул жылдын октябрь айынан тартып билим берүү кызматкерлеринин эмгек акысы жогорулады. Бирок мамлекет ушуну менен токтоп калбайт, балдардын жана өлкөнүн келечеги үчүн мугалимдерге татыктуу шарт түзүп беребиз", — деп айтылат куттуктоодо.
Мындан тышкары, өлкө башчы мугалимдерге талыкпаган эмгеги үчүн ыраазылык билдирип, чың ден соолук, бакыт-таалай жана зор ийгиликтерди каалады.
Эске салсак, 1-октябрдан тарта билим берүү тармагындагы 120 миң кызматкердин маянасы 30 пайызга жогорулады.
