Чек ара жаңжалы. Тышкы иштер министрлиги тажик элчисине нота берди

БИШКЕК, 17-сен. — Sputnik. Тажикстандын Кыргызстандагы элчиси Сухроб Олимзода КР Тышкы иштер министрлигине чакырылды. Бул тууралуу ТИМдин маалымат кызматы билдирди.

Ага ылайык, министрдин биринчи орун басары Нуран Ниязалиев элчи Сухроб Олимзодага Тажикстандын Улуттук коопсуздук боюнча мамлекеттик комитетинин чек ара аскерлеринин мыйзамсыз аракетин сындаган нота тапшырды.

Маалыматта тажик чек арачыларынын Максат жана Сай чек ара бекеттерин аткылагандыктан Кыргызстандын бир чек арачысы окко учуп, жети жоокер жаракат алганы жазылган. Андан сырткары, жети жай тургун жабыркаган, анын ичинде 12 жашар бала да бар. Аны менен катар аталган чек ара бекеттери талкаланып, жергиликтүү тургундардын үйлөрү да зыянга учураган.

"Ниязалиев тажик тараптан Кыргызстандын чек арачылары менен Максат айылынын тургундарына ок чыгарууга жол берилбей турганын баса белгиледи", — деп айтылат маалыматта.

Андан сырткары, тажик элчисине август-сентябрь айларында Тажикстандын жарандары, жергиликтүү бийлик өкүлдөрү жана башка компетенттүү органдар тарабынан мыйзамсыз жана чагымчылдык аракеттер болгонун маалымдаган.

"Тажик тараптын аракеттери эки мамлекет башчыларынын 26-июлда жолугушуусунда жетишилген макулдашууларга каршы келери белгиленди", — деп айтылат министрликтин тараткан билдирүүсүндө.

Ниязалиев өз кезегинде бардык көйгөйлөр сүйлөшүү жолу менен коңшулук алаканын негизинде чечилиши керектигин баса белгиледи.

Жаңжалдын тутанышы

Эске салсак, 16-сентябрда кечке жуук тажик чек арачылары Лейлек районундагы  Максат жана Сай чек ара бекеттерине ок аткан. Анын кесепетинен бир аскер каза болуп, 13 кишинин жаракат алганы кабарланган. Жабырлануучулардын жетөө аскер кызматкери болсо, алтоо — жай тургундар. Ал эми Тышкы иштер министрлигинин акыркы маалыматы боюнча, жаракат алган жай тургундардын саны жетиге жеткен. Ошентип жаңжалдан жаракат алгандардын саны 14 киши болду. Алардын баарына медициналык жардам берилип, Исфана шаарындагы райондук ооруканада жаткан 10 бейтап Бишкекке жөнөтүлдү. Эки аскердин абалы оор.

Кыргыз тарап жаңжалдын чыгышына Лейлектин Максат айылына жакын жердеги Жака-Өрүк аймагына (Баткен районуна карайт) тажик тараптын курулуш иштеринин башташы себеп болгондугун айткан.  

Ушу тапта окуя болгон жерде премьер-министр Мухаммедкалый Абылгазиев баштаган аткаминерлер жүрөт.

Тажик тараптын версиясы

Чек ара жаңжалы боюнча Тажикстандын расмий органдары да билдирүү жасады. Улуттук коопсуздук боюнча мамлекеттик комитетинин чек ара аскерлери ок атууну кыргыз тарап биринчи баштаганын билдирген. Маалыматка ылайык, кыргыз тарап 16-сентябрда саат 18:45тер чамасында Бахор аймагындагы спорт аянтчасына курулуш иштерин баштаган. Жергиликтүү тургундар (тажик тарап) курулуш иштерин токтотууну талап кылышкан.

Маалыматта эки тараптуу жетишилген макулдашууларга карабай Кыргызстандын куралдуу күчтөрү кошумча 250-300дөй аскерди тартканы айтылат. 16-сентябрда болгон жаңжалда тажик тараптан да жаракат алгандар бар экенин ЖМКлар жазууда.