БИШКЕК, 15-сен. — Sputnik. Президент Сооронбай Жээнбеков убактылуу өкмөттүн мүчөлөрү менен жолукканы тууралуу социалдык тармакта тараган маалыматты өлкө башчынын басма сөз катчысы Толгонай Стамалиева тастыктады.
Анын айтымында, президент УӨ мүчөлөрүн 14-сентябрда бейрасмий жолугушууга чакырган.
“Ушундай эле иш-чара Эгемендик күнүнө карата өкмөт жана парламенттин мурунку жетекчилери менен да өттү. Максаты — өлкөнүн өнүгүүсүнө байланыштуу пикир алмашуу. Бул өңүттөгү жолугушуулар салтка айланып бара жатат”, — деди Стамалиева.
Эскерте кетсек, Жээнбеков былтыр ЖМК жетекчилери жана бейөкмөт уюмдардын өкүлдөрү менен жолуккан. Стамалиева бул иш-чара жакын арада кайталанарын кошумчалады.
