БИШКЕК, 3-сен. — Sputnik. Ош шаарынын мэриясы ипотекага бериш үчүн тогуз кабаттуу үй кура баштады. Бул тууралуу аталган калаанын мэриясынан кабарлашты.
80 батирден турган ипотекалык үйдүн курулушуна капсула 2-сентябрда салынды. Калаа башчысы Таалайбек Сарыбашов мэрия тарабынан алгачкы жолу ипотекалык негизде көп кабаттуу үй курулуп жатканын айтып, экинчи көп кабаттуу үйдүн да курулушу жакынкы айларда баштала турганын билдирди.
Тактап айтканда, Ош жана Жалал-Абад шаарларын калыбына келтирүү боюнча мамлекеттик дирекциясы курган үйлөрдөн артып калган батирлерди ипотекага берүүдөн түшкөн каражатка курула баштады.
80 батирдин ичинен 1 бөлмөлүү 32 батир, 2 бөлмөлүү 32 батир, 3 бөлмөлүү — 16 батир болот.
Жер төлөсүнө автоунаа токтотуучу жай курулат.
Үйдүн курулушу бүткөндөн кийин батирлерди бөлүштүрүү жана берүү боюнча атайын комиссия түзүлөт.
