БИШКЕК, 31-авг. — Sputnik. Көк бөрү боюнча Кыргызстандын президентинин кубогун "Достук" командасы утуп кетти.
Оюндун башында эле 5-мүнөттө "Ынтымак" командасынын улакчысы Аудасбек Мырзабек уулу эсепти ачты. Ал эми экинчи бөлүктүн 7-мүнөтүндө жекеме-жекеден "Достуктун" оюнчусу улакты Эрсултан Айдаркан уулу алып чыгып, тай казандан бир аз өтүп жерге түшүрүп алды. Аны кайра Манас Ниязов эңип алып чапкан бойдон барып тай казанга ыргытты.
Ошентип үчүнчү оюн башталганда дагы Манас Ниязовду каршылашы дагы капталдан келип урдуруп, ал аттан учуп кетти. Бактыга жараша Ниязов оор жаракат алган жок. Андан кийин "Ынтымак" командасынын оюнчулары суурулуп чыгып тай казанга ыргытты эле улак түшүп, кайра секирип сыртка чыгып кетти. Демек, упай эсептелген жок.
Кайра эле таластык команданын улакчылары чабуул жасап, "Достуктун" тай казанынын жанына келип салууга аракет кылган. Бул жерде катуу тирешип, натыйжада Манас Ниязов сууруп чыкты да, чаң ызгыткан тейде чаптырып барып тай казанга салып койду. Арадан көп өтпөй "Ынтымактын" оюнчусу Нуржан Мелисбек уулу бир улак салып, эсеп санын теңдеди.
15-мүнөттө улакты алып бараткан "Ынтымактын" оюнчусу Сейитбек Анарбек уулу аттан жыгылып, оюн бир саамга токтотулду. Калыстар кеңешип, аны атаандашы атайылап түрттүрбөгөнүн аныктады.
Оюндун кызыгы эң аягында болду. Бүтөөрүнө 15 секунд калганда "Достуктун" оюнчусу Майрамбек Рыспеков бир улак салууга жетишип, 3:2 эсеби менен көк бөрү аяктады.
Натыйжада, баш байгени уткан командага бир миллион сом, экинчи орун 500 миң, ал эми үчүнчү орунду алган "Сары-Өзөн" командасына 250 миң сом берилди.
"Достук" менен "Ынтымак" командалары күчтүү атаандаштар, дайыма республикалык турнирлердин финалында беттешишет. Жеңиш эки тарапка тең ооп турат. Алсак, быйыл 9-майдагы мелдеште "Достук" 1:0 эсеп менен жеңип алса, Нооруз майрамындагы оюнда 6:1 эсебинде "Ынтымак" утуп кеткен.
