БИШКЕК, 26-авг. — Sputnik. Волейбол боюнча улуттук курама команданын капитаны Оңолбек Каныбек уулу Азия чемпионатында
борбордук аймактагы тайпалардын ичинен мыкты оюнчу деп аталды. Бул туурасында КРдин Волейбол федерациясынын сайтында айтылат.
Азиянын аймактык чемпионаты 19-24-август күндөрү Непалын Катманду шаарында өткөн. Анда улуттук курама команда төрт өлкөнүн тең тайпасын 3:0 эсеби менен утуп биринчи орунга ээ болгон. Кечээ спортчуларды "Манас" аба майданынан салтанаттуу тосуп алышты.
"Оңолбек Каныбек уулу мелдештердин бардык бөлүгүндө ойноп, курама команданын ичинен эң мыкты жыйынтыкты көрсөтө алды", — деп айтылат маалыматта.
Волейболчу мындай наамга биринчи жолу 2017-жылы татыганы айтылды.
Азиянын аймактык чемпионатында Кыргызстан, Непал, Мальдив аралдары, Түркмөнстан, Өзбекстан, Бангладеш жана Афганистан болуп, жалпы жети өлкө ойноду.
