БИШКЕК, 24-авг. — Sputnik. Кыргыз-тажик чек арасында эки окуя болду. Биринчисинде, чек арачылар эскертүү берүү үчүн асманга ок чыгарган. Бул тууралуу Мамлекеттик чек ара кызматынан кабарлашты.
Лейлек районундагы Жаңы-Жер айыл өкмөтүнө караштуу Тажикстан менен чектешкен Борбордук айылында 24-август күнү, саат 15.30да эки өлкө жарандары ортосунда чуу чыккан.
“Тажикстандын 15-20дай жараны алардын үйү чек аранын такталбаган аймагында жайгашканын айтуу менен Жаңы-Жердин жашоочусунан тосмо курууну токтотуусун талап кылышкан”, - деп айтылат маалыматта.
Чек арачылар конфликт чоң чууга айланып кетпесин деп абага эки ирет эскертүүчү ок чыгарганда гана тажикстандыктар өз аймагына качкан.
Экинчи окуя саат 15.40та Баткен районундагы Көк-Таш айылында болгон. Тажикстандын Исфара районундагы Хожа – Аъло айылынын тургундары Аксай – Көк-Таш жолунун курулушуна нааразы болуп чыгышкан. Бирок тажик тараптан түшүндүрүү иштери жүргүзүлгөндөн кийин тарап кетишкен.
Учурда чек арадагы абал туруктуу.
