БИШКЕК, 13-авг. — Sputnik. Кыргызстандык 16 жаштагы Улукбек Байзаков картинг боюнча Россиянын ачык чемпионатында жетинчи орунду ээледи. Бул тууралуу Sputnik Кыргызстан агенттигине спортчунун атасы Бакыт Байзаков билдирди.
Анын айтымында, жарышка Россия, Кыргызстан жана Казакстандан 120дай спортчу катышкан.
"Улукбектин мындай ийгилиги Кыргызстан эгемендүүлүктү алган жылдан берки тарыхында биринчи жолу болуп жатат. Үч жыл мурун да ушул эле чемпионатка катышып, 19-орунду алган. Бул жолкусунда ал Европа жана Дүйнө чемпионатынын алдыңкылары менен ат салышып, ондукка кирди", — деди спортчунун атасы.
Картинг — жарышка ылайыкталган атайын автоунаалар менен саатына 260 чакырымга чейинки ылдамдык менен жарышуучу спорттун түрү.
Улукбек Байзаков өлкөдөгү автоспортчулардын сап башында турат. Ал картинг боюнча Кыргызстандын 8 жолку чемпиону болуп жана Казакстандагы эл аралык мелдештерде бир нече кубокторду уткан. Анын Sputnik Кыргызстан агенттигине берген маегин бул жактан окуй аласыздар.
