БИШКЕК, 6-авг. — Sputnik. Улуттук коопсуздук мамлекеттик комитети Солтон-Сарыдагы окуя боюнча чагымчыл, улуттар аралык кастыкты козута турган видеолорду таратып жаткандарга чара көрөт. Бул тууралуу УКМКнын маалымат кызматы билдирди.
"Видеоматериалдар коомчулуктун терс, кызуу реакциясын жаратып, инвестор "Zhong Ji Mining company" компаниясынын кызматкерлери менен жергиликтүү калктын улут аралык тирешүүсүнө себеп болушу мүмкүн", — деп айтылат маалыматта.
5-августта Солтон-Сарыда жергиликтүү эл кайтадан чогулуп, алтын казып жаткан Кытай компаниясынын ишин токтотууну талап кылышкан. Аягында пикир келишпестиктен улам тараптар бири-бирин ташка алган. Жаракат алган айрым жарандар аймактык ооруканага жеткирилген. Абалды жеринен көзөмөлдөө жана элге түшүндүрүү иштерин жүргүзүү үчүн 6-августта эртең менен биринчи вице-премьер-министр Кубатбек Боронов менен ички иштер министри Кашкар Жунушалиев чыгып кеткен.
