БИШКЕК, 2-авг. — Sputnik. Аутист баланын атасы Мирлан Ишенов Бишкек шаарынан Ысык-Көлдүн Тоң районуна чейин веложүрүш жасайт. Бул тууралуу Sputnik Кыргызстан маалымат агенттигине өзү билдирди.
Анын айтымында, веложүрүштүн максаты — аутист балдардын ата-энелерине маалымат жеткирүү.
"Өзүбүз Тоң районунда турабыз. Ортончу уулубуз аутист экенин билгенден бери Бишкекте реабилитациядан өтүп жатабыз. Аймактарда көп адамдын аутизм тууралуу маалыматы жок. Айрымдар баласы көпкө чейин сүйлөбөсө "тили кеч чыгар" деп жүрө берет. Мындан сырткары, кээ бир ата-энелер кайдыгерлик кылып аутист чүрпөлөрүн дарыгер, адистерге көрсөтпөйт. Аны канчалык эрте аныктап, убагында реабилитация кылса, кийин бала коомго өз алдынча кошула алат. Ошондуктан Тоң районуна жеткиче мен аутизм тууралуу "Рука в руке" коомдук бирикмесинин маалымат баракчаларын таратайын деп чечтим. Негизи велосипед менен Бишкектен Ысык-Көлгө жөн гана барып көрөйүн дегем. Бирок бул жүрүштү пайдалуу иш менен айкалыштырууну туура көрдүм", — деди Ишенов.
"Тоң районуна жеткиче жол боюндагы айылдарга, ФАПтарга кирип баракчаларды таратып, эл менен кошо сүйлөшө кетебиз. Бул боюнча адамдын маалыматы канчалык көп болсо, алар балдарын адиске ошончо эрте көрсөтүшөт. Балдарга кайдыгер мамиле жасабайлы", — деди аутист баланын атасы.
Веложүрүш 3-августта саат 13:30да Гапар Айтиев көчөсүндө жайгашкан "Рука в руке" коомдук бирикмесинин кеңсесинин жанында башталат.
Мирлан Ишенов буга чейин экомарафонго катышып, жөө күлүктөр менен Ысык-Көлдүн айланасындагы таштандыларды тазалап чыгышкан.
