БИШКЕК, 26-июл. — Sputnik. Кыргызстан менен Россиянын жаштарын жалпы максат жана тарых бириктирип турарын премьер-министр Мухаммедкалый Абылгазиев билдирди. Ал Кыргызстан менен Россиянын жаш лидерлеринин форумунда сөз сүйлөдү.
Анын айтымында, эки мамлекеттин достугу бекем экенин убакыт көрсөттү.
"Эгер тарыхка кайрыла турган болсок, Кыргызстан менен Россиянын достугу кылымдардан бери келе жатат. Биз биргеликте постреволюциядан кийинки коллективизациядан өттүк, Советтер Союзунда жаңы жашоону курдук, Улуу Ата Мекендик согушта бирге болдук. Ошол эле учурда Байкал-Амур магистралынын курулушун, Токтогул ГЭСин, Чоң Чүй каналынын салынышын эске алышыбыз керек. Дал ушул курулуштар жаштардын дем-күчү менен ишке ашты. Жаштардын баатырдык эмгегинин арты менен стратегиялык милдеттер аткарылды", — деди Абылгазиев.
Форум 25-27-июлда Бишкекте болуп, 30-июлга чейин Чолпон-Атада уланат. Аталган иш-чара Кыргызстандын Жаштар иши, дене тарбия жана спорт боюнча агенттиги менен Россиянын Жаштар иши федералдык агенттиги тарабынан өткөрүлүүдө.
Форумдун катышуучуларына улуу жазуучу Чыңгыз Айтматовдун үй-музейи көрсөтүлөт. Андан сырткары, Кырчын жайлоосу менен "Рух Ордо" маданий борборуна экскурсия уюштурулат.
Иш-чаранын соңунда Кыргызстан менен Россиянын жылдарын эки мамлекетте өткөрүү боюнча иш-аракеттердин планы иштелип чыгат.
