БИШКЕК, 15-июл. — Sputnik. Нигериянын сенатору жана жарандык укук боюнча конгресстин президенти Шеху Сани мекендеши Али Абубакардын өлүмү боюнча Кыргызстандын өкмөтүн жоопкерчиликке тартууга чакырды. Бул тууралуу ал өзүнүн Twitter баракчасына жазган.
Саясатчы өзүнүн билдирүүсүндө нигериялыктардын чет өлкөдө көп каза боло баштагандыгына кооптонуп жаткандыгын айткан.
"Федералдык өкмөт Али Тиджани Абубакардын мыкаачылык менен өлтүрүлгөндүгү боюнча Кыргызстандын бийлигин жоопкерчиликке тартышы керек", — деп жазды ал.
Our Jaws is bleeding and we are turning the other cheek.The rise in the killings of Nigerians overseas is becoming alarming.The FG must hold the Government of Kyrgyzstan to account over the brutal murder of Aliyu Tijjani Abubakar.
— Senator Shehu Sani (@ShehuSani) 13 июля 2019 г.
Эскерте кетсек, окуя 2-июль күнү болжол менен саат 16.00дө ЦУМдун жанынан болгон. Чет элдик жаранды жанындагы киши бир чаап, соккудан улам ал асфальтка кулап эс-учун жоготкон. Жабырлануучу реанимацияда комага түшүп калган.
Кийин премьер-министр Мухаммедкалый Абылгазиев ички иштер министри Кашкар Жунушалиевге чет элдик жаранды сабаган жаранды табууну тапшырган.
Кылмышка шектүү катары 22 жаштагы кыргызстандык жигит кармалган.
Тергөө маалында маркум менен шектүү бири-бири менен тааныш эместиги, экөө ЦУМдун чыга беришинен кокусунан түртүшүп кеткендиги аныкталган. Андан кийин сөздөн-сөз чыгып уруша кетип, шектүү чет элдик жаранды уруп жибергенде жыгылып, жерге кара кушу менен тийген.
Кылмыш ишин Свердлов райондук ички иштер башкармалыгынын кызматкерлери иликтөөдө. Иш Жазык кодексинин 138-беренеси («Ден соолукка оор зыян келтирүү») боюнча Кылмыштар жана жоруктар боюнча бирдиктүү реестрге катталган.
