БИШКЕК, 7-июл. — Sputnik. Бишкек шаарынын милициясы Нигериянын жаранын бир чапты деп шектелип жаткан жаран окуя болгон учурда түз эфирде ким менен сүйлөшүп жатканын аныктады. Бул тууралуу ШИИБдин маалымат кызматы билдирди.
Ыкчам тергөө аракеттери учурунда шектүү К.Э. ЦУМдун жанында болгон окуяга чейин түз эфирде Жалал-Абад облусунун 25 жаштагы тургуну С.К. менен сүйлөшүп жатканы белгилүү болду. Ал өз көрсөтмөсүндө шектүүнүн дос кызы экенин жана 2017-жылдан бери такай байланышып турарын айткан.
"2-июлда болгон окуя тууралуу айта турган болсом, мындай: кармалган жаран саат болжол менен 16:00дөр чамасында социалдык тармакта түз эфирге чыгып, ГУМдун тышын көрсөтүп жаткан. Анын Москвадагы достору да түз эфирде отуруп, ГУМду көрсөтчү деп суранышкан. Ал ортодо мен бирөөнүн сөгүнгөнүн угуп калып, "Эмне болду?" деп суроо салдым. К.Э. чет элдин жараны аны сөгүп жатканын айтты. Мен ага "көңүл бурбай эле кой" дегем. Бирок К.Э. ЦУМга жетип калган учурда жанагы эле үн "Сен эмне мени видеого тартып жатасыңбы?" деп кекетип сурады. К.Э. "Мен сени тарткан жокмун" деп жооп кайтарды. Бирок чет элдин жараны үнүн өктөм чыгарып, дагы бир нерселерди айтканда К.Э. аны чаап жиберди. Ошону менен түз эфир бүтүп калды", — деп С.К. аттуу жаран көрсөтмө берген.
Учурда Бишкек шаарынын Свердлов райондук ИИБи сотко чейинки териштирүү иштерин жүргүзүүдө.
ИИМдин маалымат кызматынын жетекчиси Бакыт Сеитов маркум менен шектүү бири-бири менен тааныш эместигин, экөө ЦУМдун чыга беришинен кокусунан түртүшүп кеткенин айткан. Андан кийин сөздөн-сөз чыгып уруша кетип, шектүү чет элдик жаранды уруп жибергенде жыгылып, жерге кара кушу менен тийгенин билдирген.
Ал эми шектүү болсо маркум сөгүнгөндүктөн уруп жибергенин айткан.
Каза болгон жаран Бишкектеги Cambridge School мектебинин директорлугун аркалап, англис тилинен сабак Али Абубакар экени белгилүү болгон. Анын сөөгү Арча-Бешиктин үстүндөгү көрүстөнгө коюлду.
