БИШКЕК, 8-июл. — Sputnik. Кыргызстандын Россиядагы элчисинин жаңы блогу катары www.elchi.ru маалыматтык сайты ишке кирди. Анын бет ачары Кыргызстандын Россиядагы элчиси Аликбек Жекшенкуловдун Москва шаарында мекендештер менен жолугушуусунда болду.
Элчиликтин маалымат кызматынан билдиришкендей, сайттан мекендештер өздөрүнө керектүү кабарларды, документтерди таап, консулдуктун сапаттуу укуктук кеңештерин ала алышат.
"Элчи менен пикир алышууга Москва шаарындагы кыргыз диаспоралык коомдук уюмдардын лидерлери, аксакалдар, илимий-чыгармачыл интеллигенция, дарыгерлер, студенттер, жеке ишкерлер, ошондой эле ЖМКнын өкүлдөрү келишти", — деп айтылган маалыматта.
Жолугушуунун соңунда Москва шаарындагы кыргыз диаспорасынын активисттерине ыраазылык каттар тапшырылган. Маалыматта сыйлангандардын эки өлкөнүн ортосундагы достук мамилелерди бекемдөөгө салым кошкону, маданий-гуманитардык, спорттук иш-чараларга активдүү катышкандыгы айтылган.
