БИШКЕК, 8-июл. — Sputnik. Бразилиянын футбол боюнча курама командасы Америка кубогун жеңип алды.
Кечээ, жекшемби күнү, Рио-де-Жанейронун "Маракана" стадионунда континент биринчилигинин финалы болуп өттү. Бразилиялыктар өз үйүндө Перунун курама командасы менен беттешти.
Мелдеш 3:1 эсебинде аяктады. Мындай жыйынтыкка Эвертон (15-мүнөттө), Габриэль Жезус (45-мүнөттө) жана Ришарлисондун (90-мүнөттө) киргизген голдору жеткирди. Перулуктардын жападан жалгыз голун 44-мүнөттө Хосе Паоло Герреро киргизди.
Муну менен Бразилия тогузунчу жолу чемпион болду. Алар акыркы жолу турнирди 2007-жылы утуп алышкан.
