БИШКЕК, 1-июл. — Sputnik. Ысык-Көлдү сүзүп өтүү боюнча мелдеш өтөт. Бул тууралуу Nomad Sport уюмунан билдиришти.
Маалыматка ылайык, "Issyk Kul Swim Challenge 2019" аталышындагы мелдеш 18-август күнү болот. Анда 18 жаштан жогору курактагылар Ысык-Көлдүн түндүк жээгиндеги Кара-Талаа айылынан старт алып, түштүк жээгиндеги Тору-Айгыр айылына чейин 14 чакырым аралыкты багындырат.
Өткөн жылы аталган спорттук иш-чарада алты адам ат салышкан.
Уламыштар боюнча Бакыт аттуу жетим баланы айылдагы манап малчы кылып алат. 17 жыл мал кайтарган Бакыт таман акысына араңжан кулун алып, аны бага баштайт. Убакыт өтүп баягы кулундан күлүк чыгып, той-аштарда байгени эч кимге бербейт. Ошол учурда Бакыттын аты тору айгыр аталып, атагы ааламга кетет. Каргашалуу күндөрдүн биринде каракчылар Бакытты сабап, айгырды уурдай качат. Алар жылкыны Ысык-Көлдүн тескейине жашырып, кайтарууга алат. Жаныбар менен адам баласынын ортосунда сөз менен айткыс мээрим бар эле. Өз ээсин сагынган тору айгыр качып чыгып, каракчылардын камоосунда көлгө барып такалат. Уурулар мына эми айгырды кылтакка иле турган болгондо жылкы буйтай качат да, көлгө боюн таштайт. Туздуу суу жаныбардын терисин шылып, катуу толкунда кулагына суу кирет. Анткен менен тору айгыр Бакыт байырлаган айылдан сүзүп чыгат да, анын колунан жан берет. Убакыттын өтүшү менен жылкы өлгөн жерге адамдар отурукташып, кийин айыл болуп кеткен.
