23-июнь, жекшемби күнү, саат 10:45те "Ала-Тоо" аянтында Бүткүл дүйнөлүк йога күнү белгиленет. Бул тууралуу йога боюнча адис жана машыктыруучу Айгүл Ниязова Sputnik Кыргызстан радиосунун таңкы эфиринде маек куруп жатып билдирди.
Анын айтымында, мындай иш-чаранын максаты — шаар тургундарын йога менен машыгууга чакыруу жана анын ден соолукка тийгизген пайдалуу жактары тууралуу айтып берүү.
"23-июнда саат 10:45те "Ала-Тоо" аянтындагы Курманжан датка эстелигинин жанында йога күнүн белгилейбиз. Ага бардык каалоочулар катышса болот. Шаар тургундары килемчелерин алып келип, иш-чарага күбө болуп кете алат. Килемчелери жоктор үчүн Индия элчилиги узун килемче салып, шарт түзүп берет. Саамалык концерттик программа жана куттуктоолор менен коштолот. Негизи йога күнү дүйнө жүзүндө 21-июнда белгиленет, бирок биз дем алыш күнүнө тууралап өткөрүп келебиз", — деди Ниязова.
Ал Бүткүл дүйнөлүк йога күнү 2015-жылдан бери белгиленип келерин кошумчалады.
