БИШКЕК, 21-июн. — Sputnik. Сооронбай Жээнбеков бүгүн, 21-июнда, өлкөнүн финансы министри Бактыгүл Жээнбаеваны кабыл алды. Бул тууралуу президенттин маалымат кызматынан кабарлашты.
Министр өлкө башчыга мамлекеттик финансыларды башкаруу жаатындагы абал тууралуу маалымат берди.
"Сот-укуктук реформаны ишке ашыруу жана өлкөнү санариптештирүү боюнча долбоорлор өз убагында каржыланууда. Республиканын ар бир райондук борборуна үч чакырым жол куруп, оңдоп-түзөөгө каражаттар бөлүндү. Мындан тышкары, 2019-жыл ичинде орто мектептердин мугалимдерине айлык акысын жогорулатуу пландалып жатат", — деди Жээнбаева.
Ал эми өлкө башчы Мамлекеттик ипотекалык компанияга калкка ипотекалык насыяларды берүүнү жандантуу үчүн акча каражатын тез арада бөлүп берүү зарылдыгына көңүл бурду.
Ал ошондой эле бюджетке жыйымдарды тапшыруу боюнча планды аткарбаган мамлекеттик органдарга карата биринчи жарым жылдыктын жыйынтыгы боюнча тиешелүү чара көрүү керектигин баса белгиледи.
