БИШКЕК, 16-июн. — Sputnik. Кытайдын Ухань шаарынын жашоочусунун өтүнөн дарыгерлер миңдеген таш алып чыгышканын Daily Mail жазды.
Операция үч саатка созулуп, хирургдар 54 жаштагы аялдын өтүнөн 8 миңдей таш алып чыккан. Таштардын чоңу бөдөнөнүн жумурткасындай экендиги айтылат.
Дарыгерлер бейтап суу ичпей, эртең мененки тамакты да жебей жүргөнү үчүн өтүнө таш толуп кеткенин айтышкан. Аял жети жыл мурда эле оорусу тууралуу билгенин, бирок доктурлар анын кан басымы жогору болгондуктан операция жасабай койгонун айткан.
Келин ичи ооругандыктан кайрадан бейтапканага кайрылып, ичинде ушунча таш бар экендигине таң калган.
Ал эми аны операция жасаган Шэнь Чжанъи бейтапканасынын директору мындай учурга биринчи ирет туш болгонун жашырган эмес.
