БИШКЕК, 2-июн. — Sputnik. Кыргызcтанга иштөө үчүн мезгил-мезгили менен келип жаткан чет элдиктердин эмгек ишмердигин легализациялоого багытталган мыйзамда алардын милдеттүү түрдө патент алуусу айтылган. Бул жааттагы мыйзам долбоору коомдук талкууга коюлду.
Демилгечилердин бири депутат Исхак Пирматовдун айтымында, бул чара Тажикстан менен Өзбекстандан келген эмгек мигранттарынын ишин мыйзамдаштырат.
Документтин негиздеме маалымкатында чет элдик жарандар көпчүлүк учурда курулуш жана айыл чарба чөйрөсүндө, түшүм жыйноо, эгин эгүү жана башка иштерди аткарып жатканы белгиленген. Көптөгөн чет элдик жарандар курулуш бригадасынын курамында курулушчу болуп иштеп жатышат же болбосо жеке адамдардын үйлөрүн куруу боюнча убактылуу кызмат көрсөтүшөт, турак жайдын майда оңдоп-түзөө иштерин жасашат.
"Эгерде Кыргызстанда чектеш эмгекчил-мигранттардын 100 миңге жакыны жүрсө, анда патенттик система киргизилгенде патент берүүдөн бюджетке жылына 8 миллион доллар түшүшү мүмкүн (айына патент үчүн 500 сом баада алганда)", — деп айтылган документте.
Максат — мыйзамсыз миграцияга көзөмөлдү ишке ашырууда коррупциялык механизмдерге бөгөт коюу жана патент берүүдөн түшкөн каражаттын эсебинен республикалык бюджетти толтуруу экени айтылган.
