1-июндан тарта мектепке чейинки билим берүү мүмкүнчүлүгүн кеңейтүү максатында, мамлекет жеке менчик бала бакчалардагы төлөмдүн 50 пайызын өз моюнуна алууга даяр. Бул тууралуу Нурзида Касымова Sputnik Кыргызстан радиосунун таңкы эфиринде маек куруп жатып билдирди.
Анын айтымында, бул долбоор менен аялуу катмардагы үй-бүлөлөргө колдоо көрсөтүү пландалууда.
"Бүгүнкү күндө республика боюнча балдардын 26 пайызы гана бала бакчаларга барышат. Калгандары бала бакчага муктаж болуп келет. Ички миграцияга байланыштуу бала бакчалардын тартыштыгы байкалууда. Ошондуктан биз аталган долбоорду пилоттук негизде Бишкек шаарына киргизип жатабыз. Борбор калаада 85 бала бакча бар жана алар 17 500 орунга ылайыкташтырылган. Бирок бугүнкү күндө ал жакта 33 миң бала тарбияланууда. Мындан сырткары, 24 миңден ашык бала электрондук кезегин күтүп жатат. Ушул маселени бир аз да болсо жеңилдетүү максатында жеке менчик бала бакчалар менен келишим түзүп, 1000 балага шарт түзүп берүүнү карап жатабыз. Анда бала бакчадагы төлөмдүн 50 пайызын ата-эне төлөсө, 50 пайызын мамлекет өз моюнуна алмакчы", — деди Касымова.
Ал аталган социалдык кызмат 3төн 5 жашка чейинки курактагы балдарга каралгандыгын кошумчалады.
Социалдык долбоор кызматын кимдер колдоно ала турганын жана кандай документтер керектелерин шилтемеден окуй аласыздар.
