БИШКЕК, 31-май — Sputnik. Бишкек шаарынын мэри Азиз Суракматов тартип бузуунун алдын алуу боюнча укук коргоо органдарынын координациялык кеңешин өткөрдү. Бул тууралуу муниципалитеттин маалымат кызматы билдирди.
29-майда №48 мектептин жанындагы мушташтан 9-класстын окуучусу каза болгон.
Суракматов мектеп окуучусунун өлүмүнө тийиштиги бар бардык ведомстволорду жоопкерчиликке тартууну талап кылып, абалды иликтеп, мындай кырсыктарды болтурбоо үчүн чараларды көрүү керектигин айтты.
Мэриянын аппаратынын жетекчиси Балбак Түлөбаев вице-мэр Татьяна Кузнецова менен билим берүү башкармалыгынын жетекчиси Сауле Мейрманованы, Биринчи Май акиминин социалдык маселелер боюнча орун басарын жана райондук билим берүү борборунун жетекчисин дисциплинардык жазага тартууну сунуштады. Түлөбаев, андан сырткары, №48 орто мектептин директорунун жана Биринчи Май РИИБинин жаш өспүрүмдөр менен иштеген аймактык милиционеринин кызмат ордун карап көрүүнү да айтты.
