КУУнун студенттери Россиянын окуу жайларында билим алмашуу программалары менен окуп, кош дипломдун ээси боло алат. Бул тууралуу Канат Садыков Sputnik Кыргызстан радиосунун таңкы эфиринде маек куруп жатып билдирди.
Анын айтымында, Москва мамлекеттик университети менен Ломоносов борборун түзүү келишимине кол коюлду.
"Бүгүнкү күндө россиялык университеттер менен кызматташтык өтө маанилүү. Анын башында Москва мамлекеттик билим берүү жайы турат. Аталган окуу жай менен Ломоносов борборун ачуу боюнча келишим түздүк. Андагы эң негизги максат — мугалимдердин деңгээлин жогорулатып, аспирантурага жөнөтүү. Андан тышкары, ошол эле Москва шаарындагы башка университеттер менен магистратура багытында билим алмашуу программаларына катышууга мүмкүнчүлүк жаралды. Башкача айтканда, студент биринчи жылын бизде окуп, экинчи жылын ал жакта билим берүү мекемелеринен улантып, Россиянын да дипломуна ээ болот. Андан тышкары, РФтин региондорундагы окуу жайлар менен да келишимдер түзүлдү", — деди Садыков.
Ректор бул жылы КУУ 6000ден ашуун абитуриентти кабыл алууну пландап жаткандыгын кошумчалады.
