Аймактардагы окуучулардын билимге болгон кызыгуусу жана аракети жогору. Мындай пикирин Мээрим Айныкеева Sputnik Кыргызстан радиосунун таңкы эфиринде маек куруп жатып билдирди.
Анын айтымында, интеллектуалдык оюндун жүрүшүндө балдарга ата-энелери жана мугалимдери өзгөчө дем-күч берип турушкан.
"Мектеп окуучулары арасында уюштурулган республикалык акыл таймаш өтүп жаткан кезде региондордогу окуучулардын билимге болгон кызыгуусу жогору экени байкалды. Биз күтпөгөн суроолорду биринин артынан бирин берип, акыл таймаштын кантип уланарына кызыгып жатышты. Аймактагы 11-класстын бүтүрүүчүлөрү өздөрүнүн дилгирлиги, атаандашуусу менен бизди таң калтырды. Ошондой эле алардын ата-энелери, мугалимдери балдарын колдогону келип, өзгөчө дем-күч берип турушту", — деди Айныкеева.
Ал мындай акыл таймаштар окуучуларга стимул берип турарын кошумчалады.
