Алдыда эми "Сабаттуу бол" жат жазуу сынагын жыл сайын милдеттүү түрдө өтө турчу өнөктүккө айландыруу пландалууда. Бул тууралуу Назаркул Ишекеев Sputnik Кыргызстан радиосунун таңкы эфиринде маек куруп жатып билдирди.
Анын айтымында, жарандардын тилди билүү деңгээли канчалык жогору болсо, коомдун интеллектуалдык жана рухий маданияты ошончолук өсөт.
"Сабаттуу бол" жат жазуу сынагы алгач 2015-жылы өткөрүлгөн. Кийин төрт жылдай тыным болуп, уюштурулбай калган. Эми быйылкы жылы бул демилгени кайрадан жандантып жатабыз. Сынактын башкы максаты — жарандардын мамлекеттик тилди билүү деңгээлин жогорулатуу. Анткени коомчулуктун интеллектуалдык, рухий маданияты түздөн-түз тилге байланыштуу. Мындан сырткары, фонд, комитет, агенттик жана бардык министрликтер менен иш алып барып, ал жактан иш кагаздарын мамлекеттик тилде толтуруу аракеттери да көрүлүп жатат. Учурда кыргыз тилиндеги документтер аз. Ошол себептен расмий тилде жазылган иш кагаздарын кыргыз тилине которуу иштери жүрүүдө. Бул багытта биз мамлекеттик жана расмий тилдеги иш кагаздарын бирдей деңгээлге чыгарууну көздөп жатабыз", — деди Ишекеев.
Ошондой эле ал өкмөттүн №757 токтомуна ылайык, 2019-жылдан тарта бардык мамлекеттик кызматкерлер кыргыз тилин билүү деңгээли боюнча А2 үлгүсүндөгү сертификатка ээ болушу керектигин кошумчалады.
