БИШКЕК, 12-май — Sputnik. 13-майда Ош, Жалал-Абад, Ысык-Көл, Нарын облустарынын көпчүлүк аймактарында, Чүй, Талас, Баткен облустарынын тоо этектеринде жаан жаап, күн күркүрөп, бийик тоолуу райондорунда кар жаашы мүмкүн. Бул тууралуу Кыргызгидромет маалымдады.
Батыштан соккон шамалдын ылдамдыгы секундасына 4-9 метрден, Чүй, Ысык-Көл, Нарын облустарынын кээ бир райондорунда 15-20 метрге чейин жетиши болжолдонууда.
Билдирүүгө ылайык, абанын температурасы Чүй облусунда +22…+27, Таласта +21…+26 градус жылуу болот. Ысык-Көлдө күндүн табы +16…+21 градуска көтөрүлсө, Нарында +17…+22 градуска жетет. Ош жана Жалал-Абад облусунда абанын температурасы +25…+30 градус жылуу, ал эми Баткенде күндүн табы +27…+32 градуска чейин жогорулайт.
Бишкекте жаан-чачын күтүлбөйт. Ош шаарында мезгил-мезгили менен жаан жаайт. Батыштан соккон шамалдын ылдамдыгы секундасына 4-9 метрге жетет.
Абанын температурасы Бишкекте +24…+26 градуска жетсе, Ошто +26…+28 градуска көтөрүлөт.
