Sputnik Кыргызстан маалымат агенттиги "Тибиртке" рубрикасынын кезектеги чыгарылышында дал ушул соцтармактагылардын көп колдонгон сөзү жана алардын мааниси тууралуу жазды. Маалыматтар интернеттеги ачык булактардан алынды.
Хайп — англис тилинен которгондо "ызы-чуу салуу", коомчулукка бир тема же образ менен талаш-тартыш пикир жаратуу жана кандайдыр бир иш менен адамды таң калтыруу деген түшүнүк;
Инет — интернет сөзүнүн кыскартылып айтылышы;
Ретвит — бул бөлүшүүнүн, репосттун бир түрү же бирөөнүн блогун өзүңүзгө көчүрүп жайгаштыруу;
Хейтер — англисчеден которгондо "жек көрүү, жек көрүүчүлүк" дегенди билдирет. Бир нерсени жаман көргөн, башкаларды сындагандарга карата айтылат;
Аватар — соцтармак колдонуучусунун башкы сүрөтү;
Дизлайк — жакты дегенди баскан "лайктын" карама-каршысы. Эгерде сизге бир пост жакпаса, бармакты түшүрүп койсоңуз болот;
Лойс — "жакты" деген белги менен тете эле жүрөкчөнү же чоң бармакты да басып жүрөсүзбү? Ошол лойс деп аталат;
Мем — маалыматты жеткирүүнүн бир түрү. Адам, жаныбар, зат, же жөн гана сөз мемге айланат алат. Көбүнө алардын сүрөтү ачуу тамаша менен жазылып, интернетке тарайт;
Гифка — графикалык, анимациялык өтө кыска видеолор;
Флуд — интернет-форумдардагы же чаттагы мааниси жок сөздү, пикирлерди көп жазгандар;
Челлендж — мелдешип, бир аракетти жасоого чакыруу;
Репост — "репост кылып койчу" же "бөлүшчү" деген сөздү күнүгө эле угасыз;
Влог — видеоблогдун кыскартылып айтылышы;
Дакфейс — англисчеден сөзмө-сөз которо келгенде "өрдөк бет" дегенди түшүндүрөт, бул сүрөткө оозун чормойтуп түшкөн кыздарга карата айтылат;
Мессендж — билдирүү, жиберүү, жеке кат;
Тролль — социалдык тармактарда адамдардын шакаба чегишүүсү, кээде бул чагымчылдыкка да өтүп кетиши ыктымал;
Аккаунт — колдонуучунун социалдык желеге катталышы, жалпак тил менен айтканда логин менен сыр сөздүн топтому;
Твит — Twitter колдонуучуларынын кыскача блогу;
Хакер — компьютер, смартфондорду "талкалап" кирген программист. Адатта белгилүү адамдар хакерлердин курмандыгы болот;
Тренд — бул сөз ар тармакта колдонулат. Ал эми социалдык түйүндөрдө окуянын белгилүү убакытка чейин актуалдуу болуп турганын билдирет.
