БИШКЕК, 14-апр. — Sputnik. Билим берүү жана илим министрлиги 9 жана 11-класстын окуучулары үчүн мамлекеттик жыйынтыктоочу аттестация качан өтөрүн маалымдады.
11-класстын бүтүрүүчүлөрү 3-июндан 20-июнга чейин экзамен тапшырат. Эреже боюнча милдеттүү түрдө төрт предметтен жана каалоосу боюнча бир сабактан тапшыруу керек.
- математика (алгебра жана анализдин башталышы) — жазуу түрүндө;
- окуган тили боюнча (кыргыз, орус, өзбек, тажик), — эссе;
- Кыргызстандын тарыхы — оозеки;
- кыргыз тили (окутуу орус, өзбек жана тажик тилдеринде жүргөн мектептер үчүн) же орус тили (окутуу кыргыз тилинде жүргөн мектептер үчүн) — жазуу түрүндөгү комлекстүү тест, ага грамматика жана лексиканы текшерүү, текстти окуп түшүнүү камтылат;
- тандоо боюнча — геометрия, физика, химия, биология, география, чет тили, "адам жана коом"/экономикага киришүү, информатика.
Ал эми 9-класстын бүтүрүүчүлөрү үчүн экзамендер 3-18-июнь күндөрү өтөт. Алардын да билими төрт сабактан милдеттүү түрдө жана бир каалаган предмети боюнча бааланат.
- математика (алгебра) — жазуу түрүндө тест;
- окуган тили (кыргыз, орус, өзбек, тажик) — дилбаяндын элементтери камтылган изложение;
- Кыргызстандын тарыхы — оозеки;
- кыргыз тили (окутуу орус, өзбек жана тажик тилдеринде жүргөн мектептер үчүн) же орус тили (окутуу кыргыз тилинде жүргөн мектептер үчүн) — жазуу түрүндөгү комлекстүү тест, ага грамматиканы текшерүү, текстти окуп түшүнүү камтылат;
- тандоо боюнча — геометрия, физика, химия, биология, география, чет тили, "адам жана коом"/экономикага киришүү, информатика.
Мындан тышкары, министрлик 15-24-май күндөрү дене тарбия боюнча зачетторду кабыл алууну тапшырды.
