БИШКЕК, 7-апр. — Sputnik. Караколдогу мурдагы пионерлер үйүндө 6-апрелде өрт чыккан. Бирок укук коргоочулар бул нерсе атайылап жасалганын билдирип жатканын аймактык кабарчы маалымдады.
Бул үйдө эки укук коргоо уюму иштеп жүргөнүн алардын өкүлү Диляра Нарова билдирди. Анын айтымында, алар 2012-жылы абалы жакшы болгон эки бөлмөнү ижарага алып, оңдоп алышкан.
"Имарат мэрияга таандык. Социалдык камсыздоо маселеси жана жарандарга укук боюнча кеңеш берген уюмга ижара акысынын ордуна бөлмөнү оңдоп бергиле дешкен", — деди Нарова.
Ал ошондой эле мэрия имаратты түрттүрүүнү пландап жаткан болушу ыктымалдыгын, андыктан атайылап эле өрттөп жибериши мүмкүндүгүн айтты. Ал эми бул жерде иштеп жаткан уюмдун өкүлдөрү ижара боюнча келишим бар болгондуктан ал жерден чыгабыз деген планы болбогонун айтышууда.
Ысык-Көл облустук милициясынын маалымат кызматы өрт чыкканын ырастап, бирок аны кимдир бирөө өрттөп жиберди деп айтууга али эрте экенин билдирди. Экспертизалар дайындалып, бул окуя облустук милициянын жеке көзөмөлүндө экенин кошумчалады.
