ОШ, 5-апр. — Sputnik. Кара-Суу районунун Зарбалик айылынын 2010-жылы каза болгон жашоочусу Ташболот Абдрасуловдун үйүндө эч ким жашабагандыгына карабастан, 9 жыл бою электр жарыгы үчүн тынымсыз дүмүрчөк келип турган. Окуя тууралуу маркумдун энеси облустук милиция өткөрүп жаткан "Кылмыштын алдын алуу күнү" аттуу рейддин жүрүшүндө билдирди. Бул маалыматты облустук милициянын маалымат катчысы Жеңиш Аширбаев тастыктады.
Анын айтымында, тогуз жыл ичинде туум эсептелип отуруп жалпы сумма 30 миң сомго жеткен. Маркумдун энеси бул көйгөйдү тактоо максатында жергиликтүү бийликке кайрылган. Натыйжада маркум каза болгонго чейин электр жарыгына 1000 сомго жакын карызы болгону такталган. Маркумдун энеси пенсия курагында экенин, чегерилген карызды төлөй албай тургандыгын эске алып, маселени анын пайдасына чечип берди.
"Көйгөй чечилгенден кийин да 500 сом карызы бар деп көрсөтүлүп, электр энергиясын тескөөчү адис дүмүрчөк алып келген. Эне тескөөчүгө ачууланып, үйүнөн кууп чыккан", — деди Аширбаев.
Маселе экинчи ирет териштирилип, тескөөчүнүн кетирген одоно катасы экендиги аныкталды.
