БИШКЕК, 4-апр. —Sputnik. Жогорку Кеңештин депутаты Наталья Никитенко алты жолу макулдук берилгенине карабай Кыргызстанга эмне үчүн Ломоносов атындагы Москва мамлекеттик университетинин филиалын ачуу ишке ашпай калганын жана бул сунуштун таржымалын изилдеп чыгуу керектигин парламенттин жалпы жыйынында айтты.
Депутат өкмөт бир ишти жасоодо бир пикирге келип, макулдаша албай турганы Бишкекте өткөн Россия менен Кыргызстандын ЖОЖ ректорлорунун форумунда ачыкка чыканын белгиледи.
"МГУнун ректору филиал ачууга алты жолу макулдук бергенин айтты. Бирок биз өз позициябызды макулдашпаганыбыз ачыкка чыкты. Ал жетинчи ирет филиалды ачууга макулдугун берди. Эми мындан аркы кадамдын баары өзүбүздөн көз каранды", — деди депутат.
"Эмне себептен бул маселе аягына чейин чыкпай калган? Эгер кабыл алынса, мындай чечимдин тагдыры кандай болот? Ошонун бардыгын такташыбыз керек", — деди депутат.
Россиянын президенти Владимир Путиндин 28-мартта болгон мамлекеттик иш сапарынын алдында Бишкекте Кыргызстан менен Россиянын ЖОЖ жетекчилеринин форуму өткөн.
Бул маселени президент Сооронбай Жээнбеков жеке көзөмөлүнө алган болчу.
