Алардын расмий аталышы — экспресс-диагностиканын микробилогиялык лабораториясы. Ага орнотулган жабдуулар инфекциянын 60тай түрүн аныктоого жөндөмдүү. Анализдин жыйынтыгы 2-24 саатта даяр болот.
Мобилдик лабораторияларды Карантин жана өтө кооптуу инфекциялар боюнча республикалык борбордун кызматкерлери пайдаланат. Кыргызстандык вирусологдор россиялык эксперттерден тажрыйба топтогон.
Бул 2016-жылдан бери Россиядан келген үчүнчү машина. Лабораториялар Бишкекте, Каракол жана Ош шаарларында иштейт. Бири былтыр Көчмөндөр оюндарында пайдаланылган. Ага Карантин жана өтө кооптуу инфекциялар боюнча республикалык борбордун вирусология лабораториясынын башчысы Нурай Кебекбаева жетекчилик кылган.
"Көчмөндөр оюндарына турист көп келди. Биздин милдет инфекциянын очогун ыкчам аныктап, жоюу эле. Кудай жалгап, иш-чарада сасык тумоо сыяктуу кеңири жайылган жана анча кооптуу эмес инфекциялар гана аныкталды. Мобилдик лаборатория иликтөөнү кыйла тездетет. Абдан ыңгайлуу, атайын жабдуудан тарта сууга чейин керектүү нерсенин баары бар", — деди ал.
Жаз, жай мезгилдеринде аталган машиналар кайрадан инфекциянын очогу болушу мүмкүн деген жерлерди текшерүүгө жөнөйт.
Акыркы үч жыл аралыгында Россия КМШ өлкөлөрүнө 12 мобилдик лаборатория берген.
Россиянын кара тумоого каршы "Микроб" илим-изилдөө институту тарабынан даярдалган мобилдик лабораториянын аналогу жок. Аталган институттун кызматкерлери кезинде Гвинеядагы Эбола дартын жок кылууга чоң салым кошкон.
