БИШКЕК, 24-мар. — Sputnik. Ырчы Юлия Началованын атасы Виктор Началов кызы өзүн-өзү дарылап жатып каза болгонун "Россия 1" телеканалынын "Түз эфир" берүүсүндө билдирди.
Анын айтымында, Началова дарыгерге кайрылбастан бутунун жараатын өзү билгендей дарылап жүргөн.
"Дарыгерлерге эч кандай нааразычылык жок. Алар колунан келген аракетин жасашты. Кызымдын организми жаш, баары жакшы болот деп ойлодук, бирок Юлия ооруну жеңе албай койду", — деди Началов.
Юлия Началова 16-март күнү кайтыш болгон.
Юлия сахнага беш жашынан тарта ырдап чыга баштаган. Элге балдардын "Таңкы жылдыз" телесынагына катышып таанылган. Ырчылык карьерасында сегиз музыкалык альбом чыгарган.
Ал "Герой ее романа" (2001), "Бомба для невесты" (2004), "Три мушкетера" (2005), "Любовь — не шоу-бизнес" (2007) деп аталган тасмаларга тартылган.
