Бишкектеги Ахунбаев — Тыналиев көчөлөрүнүн кесилишинде 50 сотыхка жакын жерде жайгашкан базардын жери кайра муниципалитетке өткөрүлдү. Бул тууралуу Азамат Сагындык уулу Sputnik Кыргызстан радиосуна маек куруп жатып билдирди.
Анын айтымында, Фрунзе — Абдрахманов көчөлөрүнүн кесилишиндеги үч сотых жер да шаар балансына кайтарылган. Ал жерде пайдалануу мөөнөтү бүткөнүнө карабай ишмердигин улантып келе жаткан дүкөн турган.
"Ижарага алынып, мөөнөтү бүтсө да колдонулуп келе жаткан жерлерди кайра шаар балансына өткөрүү боюнча Бишкек мэриясы комплекстүү программа иштеп чыккан. Ошонун негизинде учурда жалпысынан 1,5 гектарга чукул жер кайтарылып алынды. Алардын бири Ахунбаев жана Тыналиев көчөлөрүнүн кесилишинде жайгашкан базар болчу. Ал жерде туурасы 26 метр, узуну 300 метрге жакын темир-тезек, автоунаалардын тетиктерин саткан базар иштеп келген. Бүгүнкү күндө тосмолордун баары алып салынды. Ордуна шаар тургундары үчүн сейил бак куруу пландалууда. Мындай иштер дагы да улана бермекчи. Максатыбыз шаардын башкы планына жараша көркүн калыбына келтирүү болуп саналат", — деди аткаминер.
Ал, мындан сырткары, "Аламүдүн" базарына жакын жайгашкан парктагы 40 сотых жерди ээлеген, канаттууларга жем саткан базардын да алынганын кошумчалады.
