БИШКЕК, 17-мар. — Sputnik. Sputnik агенттигинин кабарчысы вакансияларды сунуштаган ресурстарды иликтеп, Кыргызстанда кайсы кесип ээлери көп акча аларына кызыкты.
Көрсө, өлкөдө эң жогорку маяна программисттер менен финансисттерге сунушталат экен. Алар айына 30 миңден 140 миң сомго чейин алат.
Мындан тышкары, рейтингге төмөнкү кесиптер кирди:
- кыймылсыз мүлк тармагындагы адистер — 20-100 миң сом;
- маркетологдор — 12-90 миң сом;
- башкы ашпозчу — 40-75 миң сом;
- соода менеджерлери — 15-60 миң сом;
- бухгалтерлер — 25-50 миң сом;
- ар кайсы тармактагы инженерлер — 25-50 миң сом;
- долбоор-менеджерлери — 20-45 миң сом.
Ведомствонун маалыматында, Кыргызстанда эң жогорку орточо маяна 36 миң 209 сом, аны финансисттер алышат.
Алардын артында эле маалымат жана байланыш боюнча адистер турат. Бул тармактын өкүлдөрү айына 32 миң 260 сом алса, үчтүктү жыйынтыктаган энергетиктер дээрлик 31 миң сом айлыкка иштешет.
Ошол эле учурда жумушсуздардын саны да өсүп бара жатат. Мисалы, 2018-жылы 73 миң кыргызстандык ишсиз катары каттоодон өткөн. Бул мурдагы жылга салыштырмалуу 25 миңге көп.
