Жаздын келиши менен жогорку чыңалуудагы электр берүүчү чубалгылардын жанына кургак чөптөрдү өрттөгөн фактылар көп катталууда. Бул тууралуу Элзада Саргашкаева Sputnik Кыргызстан радиосуна билдирди.
Анын айтымында, электр чубалгыларынын жанына жалбырак өрттөбөш керек.
"Жер ээлери, дыйкандар жакын жерде энергетикалык объектилердин жайгашканын эске албай эле айдоо аянттарды эгин эгүүгө даярдап, куураган жылбырактарды өрттөп салууда. Күндүн жылуу болушу менен ишембиликтер да башталгандыктан, жер тазалоо иштери жүргөндөн кийин таштандылар өрттөнүп, коюу түтүндүн пайда болушуна себеп болууда. Эгер ал жогорулап кетсе, чоң кырсык болушу мүмкүн. Андыктан электр чубалгыларынын жанына жалбырак өрттөбөш керек", — деди ал.
Саргашкаева жалбырактарды электр чубалгыларынын жанына өрттөгөн учур өзгөчө Чүй облусунда көп катталып, бул маселе аталган аймакта курч болуп жатканын кошумчалады.
