БИШКЕК, 11-мар. — Sputnik. Йемендин суу ресурстары жана айлана-чөйрөнү коргоо боюнча министри Набиль Абдуллах Эфиопияда кулаган учакка кечигип түшпөй калган. Бул тууралуу анын орун басары Аммар аль-Аулаки билдиргенин РИА Новости агенттиги жазды.
"Суу ресурстары жана айлана-чөйрөнү коргоо министрибиздин аманчылыгы үчүн Кудайга ыраазыбыз. Ал каттамга бир канча мүнөт жетишпей калган. Министр келгенде учакка түшчү эшиктер жабылып калыптыр", — деп жазат ал.
Greek Reporter басылмасы Грециянын жараны Антониос Мавропулос учакка эки мүнөт кечиккени үчүн аны экипаж киргизбей койгонун жазды.
"Элдин учакка кирип жатканын көрүп, мени учакка киргизбей коюшканы үчүн аябай жинденгем", — дейт Мавропулос.
Белгилей кетсек, 10-мартта Ethiopian Airlines авиакомпаниясынын Boeing 737 учагы Аддис-Абеба — Найроби багыты боюнча учуп, Дэбрэ-Зэйт шаарына жакын жерге кулап түшкөн. Анын ичиндеги 157 кишинин (экипажды кошкондо) баары тең каза болгон. Жалпысынан 35 мамлекеттин жарандары көз жумганы айтылды.
