БИШКЕК, 5-мар. — Sputnik. Жаза аткаруу мамлекеттик кызматынын жаңы жетекчиси Мелис Турганбаев кадрдык өзгөртүүлөрдү жасаганын мекеменин маалымат кызматы билдирди.
Турганбаевдин 4-мартта кол койгон буйругуна ылайык, жаңы кызматка келгендер:
— Подполковник Таалай Бейшеналиев ЖАМКнын башкы штабынын жетекчиси болду. Буга чейин №5 абактын башчысы болчу;
— ЖАМКнын ички аудит бөлүмүнүн жетекчилигине Нурлан Дүйшөбаев көрсөтүлдү. Ал буга чейин аталган бөлүмдүн жетекчисинин милдетин аткаруучу болуп иштеп келген;
— Майор Уланбек Акелов Беловодское айылындагы №45 жатак-колониясынын башчылыгына дайындалды;
— Полковник Азамат Айманбетов №38 абактын жетекчиси болду.
Турганбаев ЖАМКнын борбордук аппаратындагы орун алмашуулардан кийин мекеменин төмөнкү катмарларынын жетекчилери да алмаша турганын белгиледи.
Мелис Турганбаев Жаза аткаруу мамлекеттик кызматынын башчылыгына 8-февралда дайындалган.
